Phoebe lanceolata (Nees) Nees - LAURACEAE

ຊ່ືພ້ອງ : Laurus lanceolaria Roxb.

ຊ່ືພື້ນເມືອງເປັນພາສາລາວ : ຕົ້ນມ່ີ​ໜູ Ton Mee Nou ; ຕົ້ນຕອງຫອມ Ton Tonghome

English   Lao   

ລັກສະນະພືດສາດ ແຫຼ່ງທີ່ຢູ່ອາໄສ ແລະ ນິເວດ ເຂດແຜ່ກະຈາຍພັນ

ລັກສະນະພືດສາດ :

ລັກສະນະເດັ່ນໆ ສຳລັບຊ່ວຍໃນການຈຳແນກຊະນິດໄດ້ : ເກັດຂອງຕາຍອດມີຂົນດົກໜາ. ດອກຂະໜາດນ້ອຍ ມີຂົນອ່ອນ ຢ່າງລະອຽດ, ຕາດອກມົນ. ໃບເກີດເປັນກຸ່ມຢູ່ປາຍກິ່ງ, ໃບອ່ອນ ມີສີອອກແດງ. ໝາກ ມີຮ່ອງຕາມລວງຍາວ ແລະ ທັງສອງສົ້ນ ຫຼຸບເຂົ້າ, ກ້ານໃບມີສີອອກຂຽວ.
ປະເພດພືດ : ໄມ້ຢືນຕົ້ນ ໃບຂຽວຕະຫຼອດປີ ສູງເຖິງ 15 ແມັດ, ງ່າຕັ້ງຊັນຂຶ້ນ ທຽບໃສ່ລຳຕົ້ນ.
ລຳຕົ້ນ ແລະ ເປືອກ : ລຳຕົ້ນຕັ້ງຊື່. ເປືອກມີຮອຍແຕກເລິກ, ສີນ້ຳຕານແກມສີຂີ້ເຖົ່າ, ເປືອກໃນ ສີແດງແກມສີນ້ຳຕານ ຫຼື ສີເຫຼືອງອົມສີສົ້ມ. ເນື້ອໄມ້ສີສົ້ມແກມສີຄີມ.
ງ່າ ແລະ ກິ່ງນ້ອຍ : ກິ່ງ່າເປັນລ່ຽມ ຫຼື ກົມ, ມີຂົນແຂງຍາວປົກຫຸ້ມດົກໜາ, ມີຊ່ອງອາກາດ.
ທາດແຫຼວທີ່ລະບາຍອອກ : ທາດແຫຼວທີ່ລະບາຍອອກ ບັນຈຸທາດນ້ຳມັນ.
ໃບ : ໃບດ່ຽວຈັບສະລັບ, ກ້ຽວວຽນ ແລະ ຢູ່ເປັນກຸ່ມຢູ່ປາຍກິ່ງ, ຂະໜາດ 10-25 x 2-8 ຊມ, ຮູບສ້ວຍແກມຮູບຂອບຂະໜານ ຫາຮູບຂອບຂະໜານ ແກມຮູບໃບຫອກ, ປາຍໃບສ້ວຍແຫຼມຫາແຫຼມເປັນຕິ່ງ, ໂຄນໃບສ້ວຍແຫຼມ, ຂອບໃບລຽບ,ແຜ່ນໃບ ຄ້າຍຄືແຜ່ນໜັງ, ເຫຼື້ອມ, ດ້ານເທິງເປັນສີຂຽວເຂັ້ມ, ດ້ານລຸ່ມສີຂຽວແກມ ສີນ້ຳເງິນ. ກ່າງກາງດູນຂື້ນຢູ່ດ້ານເທິງເລັກນ້ອຍ, ກ່າງຂັ້ນໜຶ່ງເປັນກ່າງດ່ຽວ, ແບບຂົນນົກ, ກ່າງຂັ້ນສອງສະຫຼຽງໃຫ້ກ່າງກາງ, ຂະໜານກັນຫ່າງໆ, ກ່າງຂັ້ນ ສາມສະຫຼຽງ. ກ້ານໃບຮາບພຽງ, ມີ ຂົນຂາວຫາ ຂົນອ່ອນສີເຫຼືອງປົກຫຸ້ມຢ່າງດົກໜາ. ກ້ານໃບຮາບພຽງຕາມລວງຍາວ, ມີຂົນ ສີຂາວ ຫຼື ສີນ້ຳຕານແກມສີສົ້ມ ປົກຫຸ້ມຢ່າງດົກໜາ. ຫູໃບບໍ່ມີ.
ຊໍ່ດອກ / ດອກ : ດອກຈັດລຽງກັນເປັນຊໍ່ກະຈຸກແຕກແໜງ, ຊໍ່ດອກຈັບຢູ່ຂ້າງກິ່ງ ຫຼື ຢູ່ປາຍຍອດ, ດອກມີສົມບູນເພດ, ກ້ານດອກຍ່ອຍ ຍາວ 0.2-0.4 ຊມ.
ໝາກ : ໝາກຄ້າຍໝາກເນື້ອ, ຂະໜາດ 0.8-1.2 x 0.6-0.8 ຊມ, ເມື່ອສຸກ ມີສີດຳເຫຼື້ອມ, ຮູບຂອບຂະໜານ ຫຼື ຮູບໄຂ່ແຄບ, ຫຼຸບເຂົ້າ ຢູ່ ທັງສອງສົ້ນ ແລະ ເປັນຮ່ອງ ຕາມທາງຍາວ, ກາບດອກຍັງຄົງເຫຼືອຢູ່.
ແກ່ນ : ແກ່ນ ມີ 1 ເມັດ.

ແຫຼ່ງທີ່ຢູ່ອາໄສ ແລະ ນິເວດ :

ພົບທົ່ວໄປຢູ່ຕາມປ່າດົງດິບ, ປ່າເຄ່ິງດົງດິບ, ໃນປ່າໂຄກທີມີຄວາມຊຸ່ມ ແລະ ປ່າຂັ້ນສອງທີ່ມີຄາມຊຸ່ມ ບ່ອນທີ່ມີຄວາມສູງເຖິງ 1000 ແມັດ. ອອກດອກໃນເດືອນກຸມພາ ເຖິງເດືອນມີນາ, ຈັບເປັນໝາກ: ເດືອນກັນຍາ ເຖິງເດືອນພະຈິກ.

ເຂດແຜ່ກະຈາຍພັນ :

ເກີດໃນປະເທດ ບູຖານ, ມ່ຽນມ້າ, ອິນເດັຍ, ມາເລເຊັຍ, ເນປານ, ປາກິດສະຖານ, ໄທ (ພາກຕາວັນອອກສ່ຽງເໜືອ) ແລະ ລາວ (ແຂວງບໍລິຄຳໄຊ, ຄຳມ່ວນ, ຫຼວງພະບາງ ແລະ ແຂວງຊຽງຂວາງ).

ຂໍ້ສັງເກດອ່ືນໆ, ການນຳໃຊ້ :
ລຳຕົ້ນໃຊ້ເຮັດຟືນ.

ຕົວຢ່າງທີ່ໄດ້ສຶກສາ :
BT 109, BT 116, BT 262, BT 268, BT 270, BT 272, BT 274, BT 276, BT 412, BT 509 (Herbarium of Faculty of Sciences-NUoL, NHN-Leiden and CIRAD-Montpellier).

ເອກກະສານອ້າງອີງ :
Gardner, S., Sidisunthorn, P. & Anusarnsunthorn, V. 2000. A field guide to Forest Trees of Northern Thailand. Kobfai Publishing Project. Bangkok. Thailand.

Top of the page